மதுரையைச் சேர்ந்த பிரபல கராத்தே மாஸ்டர், நடிகர் மற்றும் வில்வித்தை பயிற்சியாளரான ஷிஹான் ஹுசைனி (60) புற்றுநோய் பாதிப்பால் உயிரிழந்தார். கடந்த சில மாதங்களாக உடல்நலக் குறைவால் அவதிப்பட்டு வந்த அவர், இரத்தப் புற்றுநோய் மற்றும் அப்லாஸ்டிக் அனீமியா நோயால் பாதிக்கப்பட்டிருந்ததாக சமீபத்தில் அறிவித்தார்.

திரை உலக பயணம்

ஷிஹான் ஹுசைனி கராத்தே மற்றும் வில்வித்தையில் தமிழகத்தில் குறிப்பிடத்தக்க இடம் பெற்றவர். 400-க்கும் மேற்பட்ட வீரர்களுக்கு பயிற்சி அளித்த அவர், தமிழ்த் திரைப்படங்களில் நடித்துள்ளார். கே. பாலச்சந்தரின் புன்னகை மன்னன் திரைப்படத்தில் அறிமுகமாகிய அவர், பத்ரி, வேலைக்காரன், வேடன் உள்ளிட்ட படங்களில் நடித்துள்ளார். ஹாலிவுட் படமான பிளட்ஸ்டோன் மூலமாக சர்வதேச ரீதியிலும் கவனம் பெற்றார்.

மருத்துவ செலவுக்காக உதவிக் கேட்ட ஹுசைனி

உடல்நலக் குறைவால் மருத்துவ செலவுகளை மேற்கொள்வதற்காக தனது பயிற்சி மையத்தைக் கூட விற்பதற்கு முன்வந்தார். முன்னாள் மாணவர்கள் விஜய், பவன் கல்யாண் ஆகியோரிடம் உதவி கோரினார். தமிழ்நாடு விளையாட்டு மேம்பாட்டு ஆணையம் ரூ.5 லட்சம் நிதியுதவி வழங்கியது.

விழித்தெழாத ஒரு ஆசை

மருத்துவமனையில் இருந்தபோது, நடிகர் விஜய்யை சந்திக்க வேண்டும் என அவர் விரும்பினார். மேலும், தமிழகத்தில் வில்வித்தையை வளர்ப்பதற்காக விஜய் முன் வரவேண்டும் என கூறியிருந்தார். ஆனால், அவர் வாழ்க்கையின் இறுதி நிமிடங்களில் இந்த ஆசை நிறைவேறாமல் போனது.

மரணத்தை கொண்டாட்டமாக பார்க்கச் சொன்ன ஹுசைனி

ஏற்கெனவே தனது உடலை தானமாக வழங்குவதாக அறிவித்த ஹுசைனி, வாழ்க்கையே ஒரு கொண்டாட்டம் எனக் கூறி, யாரும் தன்னை நினைத்து வருத்தப்பட வேண்டாம் என்று பேசியிருந்தார். அவரது மறைவு கராத்தே, வில்வித்தை மற்றும் திரைத்துறையில் உள்ளவர்களைச் சோகத்தில் ஆழ்த்தியுள்ளது. அவரின் உடல் சென்னையில் உள்ள வீட்டில் பொதுமக்களின் அஞ்சலிக்காக வைக்கப்பட்டுள்ளது. பலரும் சமூக ஊடகங்களில் அவருக்கு இரங்கல் தெரிவித்து வருகின்றனர்.